نەهرۆ جەرجیس
غەریبی کۆڵانەکەتان دەکەم، غەریبی فێنکترین پیاسەی ئێوارە، ئەی ڕوو سپێدەی من، ئەی دوا مەنزڵگەی ئارامی، ئەی مەفتەن و نەتەوە و زمانی من، ئەی سامانی من، خامۆشی چاوەکانتم خۆشدەوێت، ڕووناکی قاقات دەڕژێتە تەنیاییم، تەنیاییم لە پێش دەرگاتان دەبێت بە دوو کەس، لەودیو دیواری مزگەوتێک دەفی وەفا دەژەنم، لەودیو دیواری دڵتەنگییەوە دوورگەی شادمانی دەدۆزمەوە، ئەی سەوزترین هیوای گوڵگرتوو، دێتەوە یادم، کە تەیراوەت کرد بە درێژترین شیعری من، بۆیەش هەموو شەقامەکانی ئەم جیهانە تەنگ و تارییە، دەمهێننەوە تەیراوە و لەوێوە هەست بە بۆنی شار و ئەڤینداری قەشەنگترین پیاسەی ئێوارە دەکەم.
بەرلەوەی ئێوارە بێمە کۆڵانەکەتان و هاوارا بکەم، کەسێکم لەنێو ئەم ماڵە جێهێشتووە، لەوانەیە خۆم بم و لەوێ لە بیرم چووبێت، بەرلەوەی ببمە تکاکار بۆنت دەکەم و لەدایک دەبمەوە، چیتر وەک پیاوێکی غەریبە بەدوای بای مردن ڕاناکەم. چیتریش پەنجەرە تاریکیم پیشان نادات و پیاسەش هاوڕێیەکی بێگانە نییە.
چای تاڵ بە شیرینیی پێکەنینی تۆ دەخۆمەوە، خەونەکانمان ون ناکەین، هەرگیز لە کەناری ڕووبارێک نیگەرانی جێناهێڵین، شوێن پێمان لە هەر کوچەیەک دابنێین مشتێک دڵخۆشی و پێکەنین جێدەهێڵین، بە جلی گۆرانیی وەفاوە سەربوردەی پێکەوەییمان دەبێتە یادگارییەکی بەختیار، هەموو ساڵەکانی تەمەنمت پێشکەش دەکەم، دەتوانیت بە هەموو دەرگاکانی مندا بێیتە ژوورەوە، مافی سڕینەوە و تەنانەت شکانی پەنجەرەکانیشمت هەیە. تۆ دوورگەی خۆشبەختیمیت، بۆیە شەقامەکان باسی تۆم بۆ دەکەن و چرکەکانیشم بێ تۆ بێ تاقەتن.
هاتم و تەیراوە ڕوو مانگتر خۆی دەنواند، کۆڵانەکەتان وەک هەمیشە پڕ بوو لە ڕێحان و ترێی شیرین، وشەکان لەبەر دەرگاتان سەمایان دەجریواند، جیهان گەرمی کردبوو، بەڵام باوەشت سارد و فێنک، ئەی تازە بەهاری هەمیشەیی، پەرێشانیم هەرەسی هێنا و بەستەڵەکی دڵتەنگیم توایەوە، لە تابلۆی چاوەکانتدا ون بووم و باوەشم کرد بە میهرەبانیتدا و بووم بە بێدەنگترین شەپۆلی بەیانی، چونکێ دیلێکی ئەبەدی بێ هاوڕێ بووم، له بەندینخانەی چاوەکانت.
نامشکێنیت، خاپوورم ناکەیت، سینگمت داگیر کردووە، ڕێکخەری چالاکییەکانی خوێنیت، جوانیت دەخوێنمەوە و هەوای پاک هەڵدەمژم، دوای جوانیت گۆڕێکی قووڵ میواندارییم لێ دەکات و لە فیلمی گۆڕستان دەبمە کاراکتەرێکی ناودار…
لە تەیراوەتدا ژیامەوە، لەدایک بوومەوە، لەنێو دەستەکاندا خەونی درێژم بینی، لە ئامێزتدا شیعری واڵام نووسی، چیتر من غەریبەیەک نیم، ئەی لەبەر تەیراوە و کراسی کوردی و حەیرانەکانت بمرم…
