ڕێبین مەلا ئەحمەد
رۆبۆتەکان لەژێر سایەی گەورەکان ڕیسوایی دەبەخشنەوە
کورسی گەورە دروست دەکەن!
سبەی نسێ شەقامەکان دادەپۆشێ
خۆر گەردێ گڵ نادۆزێتەوە بە ناخیدا بچێتە خوارەوە
دارستانەکان چۆڕێ ئۆکسجینیان لێ هەڵناوەرێ
سبەی مرۆڤێکی بێ ڕابردوو بەم زەوییەدا گوزەر دەکات.
لەمەودوا ڕۆبۆتەکان زاوزێ دەکەن
گۆرانی بۆ کێ بچڕم؟
کێ توانای خرۆشانی هەیە؟
لەژێر نسێی دارێکی قەراغ شەقام،
دوو مرۆڤی پیر دانیشتوون
هیچ شک نابەن بیگێڕنەوە.
چی بگێڕمەوە
کاتێ شاشەی موبایلەکان یارییەکانیان لێ سەندین
لە سۆزی دایک بێبەری بووین
گریاین
سەدای لایلایەکمان نەبیست ژیرمان بکاتەوە.
کۆمەڵگایەک، کە تەکنەلۆژیا هەموو شتێکی لێ سەندوون
هیچیان نییە بیگێڕنەوە
هیچ شک نابەن بیانبەستێتەوە بە ژیان.
لە خۆمان ونبووین
چاوم بەرایی ئەو فەرهەنگە هاوردەکراوە ناگرێ
شاد دەبم
بە حەیرانێک، لە سەرچاوەی ئەڤینێکی پاکهەڵقوڵاو
لاوکێک، بۆ جوامێریی شۆڕەسوارێکی گلاو
بەستەی شایی پێهەڵسووڕاو
چیم لە گۆرانییە بێ ڕۆحەکانی مۆدێرن!
کاتێ زەنگوڵی بەرملی بزنێک ڕاستەڕێی خەیاڵم دەکات!
دەبینم خۆت بە گۆرانییەکی بێ ناوەڕۆک هەڵواسیوە
لەجیات گۆرانیبێژێکی مۆدێرن،
هەر زێنەتە لەسەر زاری حەیرانبێژێک، گوێبیستی ستایشت بین.
دانیشتبووین
لەژێر نسێی دارێکدا خەونی سەیرۆکەن دەبینی
تاکو گەشبینانە بژین
دەمانگوت ژیان بنیاددەنێینەوە
ژیانێک پربێ لە هونەر
لەسەر فەرشی، مێرگێکی سەوزی ئاوتێزاو، بە پێخواسی سەما دەکەین
گۆرانی بۆ بەرد دەچڕین و میوزیک دەخەینە گوێچکەی ڕۆبۆتەکان.
