ئومێد قەرەنی
هەنووکە بەختەوەری کەمێک لەولاتر ڕۆنیشت:
ڕێوشوێنە ترسناکەکانی خۆی خستە ڕوو
ئاکارە ئەفسوونییەکانی… ڕەزمی ترپەی دڵی
ڕامان و ڕوانینەکانی خڕیانی هەڵڕشت…
لێ یەک واژەشی لە بارەی تاوان و بەدفەڕییەکانی نەگوت!
ئۆرفێاس لە ئادیسێکی دیکەدا
من هیچ ناکەم
تەنیا هەڵبەستان دەنووسم
تاقە بیرکردنەوە و تێهزرینم
هەر ئەوەیە کە ئێستا چ بنووسم!
ئەوها دەردەکەوێ تاقە ویست و ئامانج بێ
کە کوو و کەنگێ
خۆ وێرانکەم… لەنێوچم!
من هیچ ناکەم
تەنێ هەڵبەستان دەنووسم.
خوشکم ڕاست دەکات
تاقە ئامرازی لەنێوبردنمە!
