ئازاد بەهین
١
ڕووداوێکی سادەیە
وەک چارەنووسی درەختەکان
مەرگ لە سەرمەوە.
٢
پێڵاوەکانم دەفرۆشم
شیعرەکانم هەڕاج دەکەم
لە برساندا درەختەکان ئاو دەدەم.
٣
جەنگیش تەواو،
بەڵام کوا دێنە ئەژمار
ئەستێرەکانی زستان.
٤
پڕ لە مەزار،
جێیەک کە رۆژێک
ڕێی بەهاران بوو.
٥
ئاخ گۆڕستان…
نزیک دەبیتەوە لە باخمان
بەردەوام و بەردەوام.
٦
ئێمە لە نیشتمان
بۆ جێهێشتن لە دایک بووین!
٧
چاوی بۆ قاچە ونبووەکانی دەگێڕا
ڕێگا ڕۆیشتنی بیر چووبۆوە!
٨
مەنفا
بۆ زستانی پەیوەندییەکان
نیشتمان ئەنبار دەکات!
٩
سێبەرەکەی
پەناگەی باوكم
چەند باقە گەنمی نیوەڕۆ.
١٠
هەڵمی گوێسوانان
لە پەنجەرەی ژوورەکەمەوە
بەهار دەبینم.
١١
دڵت چۆنە؟
زستان کە هات
دەزانی.
١٢
پیاوێک:
لە دوای مردنم ئیتر
بە کۆڵانەکەتاندا تێناپەڕم!
١٣
خۆزگە دڵم لە کۆڵانێک جێ بهێڵم و
بگەڕێمەوە و سەیر بکەم
نەماوە!
